Parody mode: switch on
唔知大家有無比人話過係敗家仔o既呢?
CH做左咁多年人，都周不是諗呢種問題。CH做出o黎好似好唔介意其他人o既評價，其實心底裡都周不時諗下人地點睇我。我最唔想比人覺得我個人假。敗家仔，係一個幾嚴重o既指控。
CH記得讀書果陣，曾經被哥哥罵敗家仔。因為當時屋企有好多電腦，但都去買左台二手Powerbook，而且錢唔多。當年唔同而家，當年重有儲蓄，用真金白銀買，當年未有咩野Credit Card呀、借貸呀咁。好在當年無，如果有而家可能已經跳樓燒炭死左。
出o左黎做野，錢又唔見多左。一來因為大量錢去左還錢，另外又因為興趣比較廣泛。朋友常常話我久唔久就有新興趣，而且呢D興趣永遠都係駛好多錢。這個是事實，不容否認。做出o黎比人見到係咁，CH都無法，改變唔到o既野我CH係唔會試圖去改變，亦都唔想去解釋。
出o黎做野，做得咁辛苦，都係想玩。唔係做D乜野犯法事，唔係嫖賭飲盪吹，CH又覺得問題唔大，只不過要自己面對個後果，就係無錢駛、無儲蓄、無未來，無乜錢比到屋企比屋企人睇唔起。大駛係罪，我都唔想成為罪人，但係唔玩就係唔係可以解決問題呢?
CH曾經有一刻想過好似電車男咁，掟晒D電腦玩物落海，又或者送晒比朋友，關閉念佛，個人可能會長大D，唔會再比人睇唔起。這個做法係好有型，正所謂成長係要付出代價，而且睇返我地個社會，係唔接受我呢一類自稱好博學o既人。但係我又覺得，掟走晒佢地，最後咪又係買返返o黎。睇醫管局個廣告，除非個人想自殺，否則分晒自己喜歡o既野比人，係自殺o既先兆。如果有一日你地見到CH話分野比你，記得叫我唔好自殺。