另一半跟家人回到祖國渡假。我一支冷返元朗剪片,今次終於準時。星期六勁煲之前買落不少未睇的VCD,另外又入了幾套。心血來潮,勁想睇港產片。

  1. Beyond日記之莫欺少年窮﹣好青春,我記憶中草蜢都拍過套Yes!一族。但係我找不到VCD。最令我費解的是,世榮有個仍然叫黃靜雯的王菲、阿Paul有個萬二蚊、家強有個柏安妮,反而主線的家駒無女伴?
  2. PTU - 其實套戲無乜戲味,情節好普通。賣的反而係演員的演技,以及杜琪峰鏡頭下黑暗,但十分冷峻的香港黑夜。而阿杜,只能拍這些演員,如果拍任達華賢齊,只會好「大件事」。
  3. 監獄風雲﹣我其實睇過N次。但每次睇,個感受都有所不同。今次睇到在操場阿大咪哥、大傻哥同阿傻標哥三大幫派打架,有點像猴子或Chimpanzee打架爭地盤。我終於知道,原來一個人要跟大佬,可能是一個人的動物性所使然。
  4. 表姐你好野!﹣前排盟友聚會講起。其實對白好有張堅庭這類知識份子斧鑿的痕跡,很經營。計演員的演技,最出色反而是那班國民黨員,即是林蛟、曹達華同西瓜刨。
  5. 八仙飯店﹣跟據黃秋生在電影的說話方法:「屌!出VCD果班仆街有無睇過條母片o架!爛撚到咁點撚樣睇呀!」係,我竟然見到條母片跳帶、Miss Frame同埋因為保存不佳而出現像Out focus的現像。這是香港唯一經典Trash Movie。黃秋生很Anthony Hopkins。在這些電影,李修賢那一班警員一般都無發展空間,反而我欣賞李華月。很少有地,沒有將她拍成老乾婆,仍有少量少女味。。就算當年Playboy拍佢,都拍到成個老乾婆咁!(係呀!我睇過呀!吹咩!)不過阿黃生,筷子係用來夾餸用,而唔係咁樣用。臨尾果幕斬到劉兆銘陷包散,德州電鋸都行埋一邊。斬細路哥!重要一隻隻手咁掟出o黎。真係孔子條尿片﹣恐撚佈。我勁想睇這套電影的姊妹作「伊波拉」。

勁想睇槍火。可惜找不到DVD機個Remote,XBox又播唔到。煩到死,最後仍然未睇。